ශ්‍රි ලංකාවේ හමුවූ කොවිඩ් 19 වයිරස ආසාදිතයන්ගෙන් සියයට 46ක් එනම් අඩකට ආසන්න ප්‍රමාණයක් නාවික හමුදා සාමාජිකයන් වීම පිළිබඳව මේ වනවිට රටේ ඉහළ අංශවල අවධානය යොමු ව ඇති අතර මේ සම්බන්ධයෙන් ජනාධිපතිවරයා වෙත වාර්තාවක් ලබා දීමට කටයුතු කර ඇතැයි නාවික හමුදා ආරංචි මාර්ග පවසයි. වැලිසර හමුදා කඳවුරේ නාවිකයන්ට කොරෝනා ආසාදනය වීම හුදෙක් සුදුවැල්ලේ මත් ලෝලීන් අත්අඩංගුවට ගැනීමේ මෙහෙයුම මත පමණක් පැවරීමට නාවික හමුදාවේ ඇතැම් නිලධාරීන් උත්සාහ කළ ද අධ්‍යක්ෂ ජනරාල් තනතුරේ සහ අධ්‍යක්ෂ ධුර දරන ඉහළ නාවික නිලධාරීන් කිහිප දෙනකු ගේ අවිධිමත් ක්‍රියාපටිපාටිය නිසා මෙම තත්ත්වය නිර්මාණය වූ බව මෙම ආරංචි මාර්ග සඳහන් කරයි.
මුලින්ම වැලිසර නාවික හමුදා කඳවුරේ භටයන් කිහිප දෙනකුට කොරෝනා ආසාදනය වී ඇති බව හඳුනා ගැනුණු අප්‍රියෙල් මස 22 වැනිදා සිට මේ දක්වා එම ඉහළ නිලධාරීන් කොවිඩ් 19 වැළැක්වීම සම්බන්ධයෙන් ලබා දුන් මූලික සෞඛ්‍යය මඟ පෙන්වීම් නොසලකමින් තමන් ගේ ලකුණු දමා ගැනීමේ මෙහෙයුම් දියත් කිරීම නාවිකයන් 880කට පමණ කොවිඩ් 19 වෛරසය ආසාදනය වීම කෙරෙහි බල පෑ බව මෙම ආරංචි මාර්ග සඳහන් කරයි.
අත්තනෝමතික පිළිවෙත.
විශේෂයෙන් නාවික හමුදාවේ මෙහෙයුම් භාර අධ්‍යක්ෂ ජනරාල්වරයා විසින් මේ සම්බන්ධයෙන් ගන්නා ලද අත්තනෝමතික පියවර මේ තත්ත්වයට හේතු වී ඇති බව නාවික හමුදාවේ ඉහළ නිලධාරීන්ගේ පවා අදහස වී තිබේ. සෞඛ්‍ය සේවා පිළිබඳව නාවික හමුදා අධ්‍යක්ෂ ජනරාල්වරයා මෙන්ම ඊට පහළ නිලවල සාමාජිකයන් මෙම ඉහළ නාවික නිලධාරියාට මෙහිදී කටයුතු කළ යුතු ආකාරය සම්බන්ධයෙන් සහ රෝගය වැළැක්වීමට ගත යුතු පියවර සම්බන්ධයෙන් යෝජනා ඉදිරිපත් කළ ද මේ යෝජනා බැහැරලමින් ක්‍රියාත්මක වී ඇති බව මෙම ආරංචි මාර්ග සඳහන් කරයි.
පළමු වරට නාවික හමුදා සාමාජිකයන් අතරින් ආසාදිතයන් දෙදෙනකු හමුවීමත් සමඟ ඒ වනවිට වැලිසර නාවික හමුදා කඳවුරේ සිට නිවාඩු ලබා සිටි නාවික සෙබළුන් සහ නිලධාරීන් ගණනාවක් ආපසු ගෙන්වීමට කටයුතු කිරීමේ දී කිසිදු ආරක්ෂිත පියවරකින් තොරව කොළඹට ප්‍රවාහනය කොට කොළඹ පාසල් කිහිපයක පිහිටුවා තිබූ නිරෝධායන මධ්‍යස්ථානවලට යොමු කිරීමට පියවර ගත් අතර එහි දී එකවර විශාල පිරිසකට රෝගය ආසාදනය වූයේ ඒ වනවිටත් රෝග ලක්ෂණ නොපෙන්වා කොවිඩ් 19 වයිරස ආසාදනය වී සිටි සෙබළුන්ගෙනි. මෙසේ නාවික හමුදා සෙබළුන් කොළඹට ප්‍රවාහනය කිරීමට නාවික හමුදාවේ බස් රථ යොදා ගැනුණු අතර එම බස් රථ කිහිපයකම රියදුරන් සහ සහයකයන්ද ඒ වන විටත් රෝගයට ගොදුරු වී සිටියවුන් බව පසුව සිදු කරන ලද විමසීම්වලදී අනාවරණය වී තිබේ. එසේම රෝගය ව්‍යාප්ත වීම පාලනය කිරීම සඳහා නිර්දේශ කෙරුණු දේශීය ආයුර්වේද චිකිත්සාවක් වන දුම් මුට්ටි ආශ්වාස කිරීමට ඉඩ සැලැස්වීමේදී එය විධිමත් අයුරින් සිදු නොකිරීමද මෙසේ රෝගය නාවික හමුදා සාමාජිකයන් බොහොමයක් අතර ව්‍යාප්ත වීම කෙරෙහි බලපා ඇත.
නොසැලකිල්ල
නාවික හමුදාව යනු මුහුදේ හමුදා මෙහෙයුම් සිදුකරන ප්‍රධානතම ආරක්ෂක ඇණියයි. ඒ අනුව රට ආරක්ෂා කර ගැනීම සඳහා තම නාවික හමුදාව සතු නෞකා සහ එහි සේවය කරන නාවිකයන් ආරක්ෂා කිරීම නාවික හමුදාවේ පළමු රාජකාරියකි. ඉතා දක්ෂ ලෙස ත්‍රස්තවාදීන් සමඟ සටන් කොට නිරන්තර රට රැක ගැනීමේ කැපවීමකින් සිටින නාවික සෙබළුන් ඇහැට නොපෙනෙන වෛරසයක් වෙත බිලි දෙන්නට කටයුතු යෙදුණේ ද නොසැලකිලිමත් ව නිසා ය යන්න පිළිගැනෙන කරුණයි.
සිදුකළ යුතුව තිබුණේ වෛරසය පැතිර යන මූලික අවස්ථාවේම තම නෞකා කොළඹ වරායෙන් පිටත් කර වෙනත් ආරක්ෂිත ස්ථානයකට යැවීමය. එහෙත් නෞකා සහ ඩෝරා යාත්‍රා බොහෝමයක් කොළඹ වරායේ නැංගුරම් ලා තිබූ අතර ඒවා වෙනත් ස්ථානවලට මාරු කරන්නට පටන් ගත්තේ තත්ත්වය බොහෝ දුර දිග ගිය පසුවය. නෞකා සහ ඩෝරා යාත්‍රා වෙන් ස්ථානවලට යොමු කරද්දීවත් අවම ළුශයෙන් දුරදිග බලා ක්‍රියා කොට නැති බව පැවසේ. එම නැව් යැවීමට පෙර PCR පරීක්ෂණය සිදුකර නෞකා තුළ වෛරසය පැතිරී ඇති දැයි සොයාබැලිය හැකි වුවද එය එසේ සිදු නොකර මෙම නෞකා නොපෙනෙන වෛරසයට බිලිවීමට ඉඩ හැරිණි.
මේ පිළිබඳව තවදුරටත් ලංකාසර වෙත අදහස් දක්වන ජ්‍යෙෂ්ඨ නාවික නිලධාරියකු පැවසූයේ ඔහු දන්නා පරිදි නාවික හමුදාවට කොරෝනා වෛරසය පැමිණීමට පෙර පවා වැරදි පාරේ ගිය බවය. බොහෝ විට නාවික හමුදාව තිබූ රාජකාරියට බැහැරව යමින් ඉහළ නිලධාරීන්ගේ පෞද්ගලික අවශ්‍යතා සහ ඉහළ නිලධාරීන් ගේ පැවැත්මට අවශ්‍ය ලකුණු රැස් කිරීම සිදු වූ අතර කිසිම විටෙක තම කණිෂ්ඨ නිළධාරින්ගේ සහ නාවිකයන්ගේ අවශ්‍යතා ඉඳුම් හිටුම් පිළිබඳ සොයා බැලීමට කටයුතු නොකළ බව එම ආරංචි මාර්ග තහවුරු කර තිබුණේය.
සෑම නාවික හමුදා කඳවුරකම සාද පවත්වමින් ඉහළ නිලධාරීන් සිදු කළේ ජනතාවගේ මුදල් විනාශ කරමින් තම පටු අරමුණු ඉෂ්ට කර ගැනීමය. ඉහළ නිලධාරීන් නාවික හමුදාපතිවරයාගේද ඇස් වසමින් මෙම කටයුතු සිදු කර ඇති අතර මේ සියලු අකටයුතු ඉදිරියේ දී ජනාධිපතිවරයා සහ ආරක්ෂක ලේකම්වරයා හමුවේ දිග හැරෙනු ඇති බව පීඩිත නාවිකයෝ විශ්වාස කරති.
