ශාරීරික යෝග්‍යතා පරීක්ෂණයෙන් අසමත් වූ ජ්‍යෙෂ්ඨ ශ්‍රී ලංකා ක්‍රිකට් ක්‍රීඩකයෙක් ඉන් සමත්වීමට ව්‍යාජ ලෙස ලේඛණ සකස් කිරීම සඳහා සියලුම සදාචාරයන් බිඳ දමා විලි ලජ්ජා නැති ලෙස ශ්‍රී ලංකා කණ්ඩායමේ භෞතචිකිත්සකවරයාව පොළඹවා ගත් පුවතක් ශ්‍රී ලංකා ක්‍රිකට් අතරින් වාර්තා වේ.
වාර්තාවන පරිදි සිද්ධිය මෙසේය.
එළඹෙන බටහිරි ඉන්දීය කොදෙව් සංචාරය සඳහා තෝරගෙන ඇති ක්‍රිකට් සංචිතයේ ශාරීරික යෝග්‍යතා පරීක්ෂණ පසුගිය දෙදින තුළ පැවැත්විනි. එහිදී විස්සයි – 20, එක්දින, ටෙස්ට් කණ්ඩායම් සඳහා ක්‍රීඩකයන් 25 දෙනෙකුගෙන් යුතු සංචිතයක් සඳහා මෙම ශාරීරික යෝග්‍යතා පරීක්ෂණය පවත්වනු ලැබීය.
දැනට එංගලන්ත ටෙස්ට් තරගයට ක්‍රීඩා නොකරන ක්‍රීඩකයන් මීට සහභාගී වූ අතර ටෙස්ට් තරගය සඳහා ක්‍රීඩා කරන ක්‍රීඩකයන්ට එම ශාරීරික යෝග්‍යතා පරීක්ෂණය ලබන 03 වැනිදා පැවැත්වීමට නියම වී තිබිණි.
මෙහි පළමු ශාරීරික යෝග්‍යතා පරීක්ෂණයෙන් සමත් වී තිබුණේ ක්‍රීඩකයන් 6 දෙනෙක් පමණි. දෙවන පරීක්ෂණය වූයේ කිලෝමීරට දෙකක් දිවීමය. මෙම පරීක්ෂණයේ අරමුණවන්නේ දරා ගැනීම මැන බැලීමය. එහි දී දිවයන සෑම වටයකම කාල ගණනය කිරීමක් සිදුකර පරීක්ෂණය සමත් ද අසමත්ද යන්න තීන්දු කරයි. මෙම පරීක්ෂණ දෙකම අසමත්වන ක්‍රීඩකයන් ජාතික කණ්ඩායම නියොජනය කිරීමට ප්‍රමාණවත් පරිසාධනයන් සපුරා නැතැයි නිගමනය කෙරේ.
පළමු පරීක්ෂණය අසමත් වූ මෙම ජ්‍යෙෂ්ඨ ක්‍රීඩකයා කිලෝ මීටර දෙක දිවීමේ දෙවන පරීක්ෂණයත් අසමත්වන අකාරය එක් තේරීම් කමිටු නිලධාරියෙකු නිරීක්ෂණය කර තිබිණි. කාල ගණනයටන් අනුව මෙම ක්‍රීඩකයා ශාරීරික යෝග්‍යතා පරීක්ෂණය අසමත් වී ඇත.
එහෙත් පරිගණක ගණනය කිරීම් සමග නිකුත්වූ ශාරීරික යෝග්‍යතා පරීක්ෂණ වාර්තාවේ මෙම ක්‍රීඩකයාගේ සැබෑ දත්ත වෙනස් වී ඇති බවත් ඔහු ශාරීරික යෝග්‍යතාව සමත් වී ඇති අයුරුත් දක්නට ලැබීම නිසා සිදු වී ඇති අලජ්ජී ගනුදෙණුව හෙළි වී තිබේ. මෙම ක්‍රීඩකයා පසුගිය දිනවල අලජ්ජී සමාජ මාධ්‍ය හැසිරීමක නිරත වීම නිසා ක්‍රීඩා ලෝලීන් අතර ද ගර්හාවට ලක් වූයේය.
ශ්‍රී ලංකා කණ්ඩායම පත් වී ඇති දුගී තත්වය සම්බන්ධව මේ වනවිට සමහර ක්‍රිකට් පරිපාලකයන් ද දැඩි කලකිරීමෙන් සිටින බව වාර්තා වේ. ඔවුන් පවසන්නේ ක්‍රිකට් යනු මේ තරම් ලාභ සෙල්ලමක් නොවන බවය.
