සදෙව් රත්නායක:
ශ්‍රී ලංකා කාන්තා ක්‍රිකට් සංචිතයේ ක්‍රීඩිකාවන් 35 දෙනකු මේ සතියේදී වෛද්‍ය පරීක්ෂණයකට ලක් කිරීමට ශ්‍රී ලංකා ක්‍රිකට් ආයතනය තීරණය කර ඇතැයි ආරංචි මාර්ග සඳහන් කරයි.
පසුගියදා ක්‍රිකට් ආයතනයේ මාස 6ක ගිවිසුමකට ඇතුළත් වූ ක්‍රීඩිකාවන් මෙන්ම ඊට ඇතුළත් නොවන ක්‍රීඩිකාවන් ද මෙම පරීක්ෂණයට පෙනී සිටිනු ඇතැයි එම ආරංචි මාර්ග වැඩි දුරටත් සඳහන් කරයි.
‘මේ හැමෝම කොන්ත්‍රාත්ගත ක්‍රීඩිකාවන් නෙවෙයි. නමුත් ඉන් කිහිපදෙනෙක් අපි සංචිතයෙන් තෝරාගත්තා. මොකද කොන්ත්‍රාත්ගත ක්‍රීඩිකාවක් හෝ ක්‍රීඩිකාවන් කිහිපදෙනෙක් ශාරිරික යෝග්‍යතා සහ වෛද්‍ය පරීක්ෂණයෙන් අසමත්වුවහොත් අපිට ඒ වෙනුවට වෙනත් ක්‍රීඩිකාවන් ආදේශ කළ හැකි නිසා කොන්ත්‍රාත්ගත නොවූ ක්‍රීඩිකාවනුත් මේ පරීක්ෂණයට තෝරාගත්තා.‘ ක්‍රිකට් ආයතන ආරංචි මාර්ග සඳහන් කළේය.
එම වෛද්‍ය පරීක්ෂණය කොවිඩ් 19 පරීක්ෂණයක් නොවන බවත්, වෛද්‍ය හා ශාරිරික යෝග්‍යතා පරික්ෂණ කිහිපයක් බවත් වාර්තා වෙයි.
ඊට රුධිර සාම්පල පරීක්ෂණයක් ද ඇතුළත්ය. මෙම පරීක්ෂණය ක්‍රීඩා වෛද්‍ය ඒකකයේ වෛද්‍යවරුන් හා වෛද්‍යවරියන් සිවුදෙනකු විසින් සිදු කරනු ලැබේ.
අනතුරුව එම ක්‍රීඩිකාවන්ගේ දෛනික පුහුණුවීම් මේ මස 29 වැනිදා ආර්.ප්‍රේමදාස පිටියේ පිහිටි අධිතාක්ෂණික මධ්‍යස්ථානයේදී ආරම්භ කෙරෙන බව ද ආරංචි මාර්ග සඳහන් කරයි.
එම පුහුණුවීම් සඳහා වෛද්‍ය උපදෙස් ලබාදීමට මේ වනවිට පල්ලෙකැලේ දී පැවැත්වෙන ක්‍රිකට් ක්‍රීඩකයන්ගේ දෙවැනි නේවාසික පුහුණුව අධීක්ෂණය කිරීමට පත් කර ඇති ක්‍රීඩා වෛද්‍ය විශේෂඥවරිය වන දමින්දා අත්තනායක මහත්මිය එක්වීමට නියමිතව තිබේ.
ඉදිරි මාස 6 ක කාලයක් සඳහා ක්‍රීඩිකාවන් ගිවිසුම්ගත කිරීම පසුගියදා ක්‍රිකට් ආයතනය විසින් සිදු කරන ලදි. ඊට ප්‍රවීණ ක්‍රීඩිකාවෝ, යොවුන් ක්‍රීඩිකාවෝ මෙන්ම පාසල් ක්‍රීඩිකාවෝ ද ඇතුළත් වෙති.
