සදෙව් රත්නායක –
මාස 6කට වඩා කාලයක් තරගකාරී ක්‍රීඩාවට එක්නොවූ ගෝල් ග්ලැඩියේටර්ස් කණ්ඩායමේ නායක 40 හැවිරිදි ශහිඩ් අෆ්රිඩි නායකත්වයේ ඉනිමක් ක්‍රීඩා කරමින් සිය සුපුරුදු ප්‍රහාරය දියත් කරද්දී යොවුන් පිතිකරු අවිශ්ක ප්‍රනාන්දු එල්.පී.එල්. තරගාවලියේ දෙවැනි තරගයේදී ජැෆ්නා ස්ටැලියන්ස් කණ්ඩායම කඩුලු 8ක ජයග්‍රහණක් කරා රැගෙන ගියේය. ගෝල් ග්ලැඩියේටර්ස් කණ්ඩායම පළමුව පන්දුවට පහරදී ඕවර 20ට රැස් කළ ලකුණු 175 හඹා ගිය ජැෆ්නා ස්ටැලියන්ස් කණ්ඩායම තරගය ජයගත්තේ තවත් පන්දු 3ක් ඉතිරිව තිබියදීය.
නියමිත දිනයේදී පැමිණීමට ගුවන් යානය මඟ හැරීම හේතුවෙන් ඊළඟ දිනයේදී ශ්‍රී ලංකාව පැමිණි අෆ්රිඩි ඊයේ ගෝල් ග්ලැඩියේටර්ස් වෙනුවෙන් පළමු තරගයට ක්‍රීඩා කළේ ඔහුට දින 7ක කාලයක් නිරෝධානය වීමට සිදුවනු ඇතැයි පළවූ පුවත පුස්සක් බවට පත් කරමිනි.
අෆ්රිඩි පළමු තරගයට ක්‍රීඩා කරන බව වැඩිදෙනකු දැනගත්තේ ඔහු කාසියේ වාසිය උරගා බැලීමට පිටියට පිවිසි විටදීය. ශ්‍රී ලංකාවට ගොඩ බැස පැය 48ක් ගතවෙද්දීම ඔහුට අයි.පී.එල්. තරගාවලියට එක්වීමට වාසනාව ලැබීම ඇතැමුන්ගේ විමතියට ද හේතුවකි. අෆ්රිඩි ඊයේ තරගයට ක්‍රීඩා කළේ විදෙස් ක්‍රීඩකයන්ට දැඩි සෞඛ්‍ය නීති පනවා ඇතැයි ද, ඕනෑම විදෙස් ක්‍රීඩකයකු මෙරටට පැමිණි විට දින 14ක කෙසේ වෙතත් දින 7ක නිරෝධායන කාලයක් ගත කළ යුතුව ඇතැයි ද කියමින් යම් යම් ප්‍රකාශ ඉදිරිපත් කළ සියළු වගකිව යුත්තෝ හුදු කයිවාරුකාරයෝ බවට පත් කරවමිනි.
අන්තර්ජාතික විස්සයි20 ලීග් තරග බිමේ නොම්මර එකේ ප්‍රහාරක පිතිකරුවකු සහ උපක්‍රමශීලී දඟපන්දු යවන්නකු වන මේ තුන්ඉරියව් ක්‍රීඩකයා මීට පෙර කොවිඩ් ආසාදනය වී සුවය ලැබූවෙකි. මීට පෙර කොවිව් ආසාදිතව සුවය ලැබූ හෙයින් අෆ්රිඩිගේ ශරීරයේ වෛරසයට එරෙහි ප්‍රතිදේහ පවතින බවත්, එබැවින් යම් හෙයකින් කොවිඩ් ආසාදනය වූවත් ඔහුගෙන් වෙනත් පුද්ගලයකුට එය බෝවීමේ කිසිදු අවදානමක් නොමැති බවත් වෛද්‍ය පරීක්ෂණ මගින් තහවුරු වී ඇතැයි ද කියැවේ.
කාසියේ වාසිය දිනූ අෆ්රිඩි පළමුව පන්දුවට පහරදීමට තීරණය කළ අතර, ඔහුගේ තීරණය ප්‍රතිවාදී ජැෆ්නා ස්ටැලියන්ස් කණ්ඩායමේ නායක තිසර පෙරේරා ද සතුටට පත් කළේය. ඔහු සිතා සිටියේ ද යම් හෙයකින් කාසියේ වාසිය ඔහු ජයගත්තා නම් පළමුව පන්දුවට පහරදීමට ගෝල් ග්ලැඩියේටර්ස් කණ්ඩායමට ආරාධනා කිරීමටය.
තිසරගේ ප්‍රකාශය සත්‍ය බව පසක් කරමින් පළමුව පන්දුවට පහරදුන් ගෝල් ග්ලැඩියේටර්ස් පිතිකරුවන්ට ලකුණු අතරට පිවිසීමට කිසිදු ඉඩක් නොලැබිණි. ඒ සඳහා කිසිදු බුරුලක් නොදුන් ජැෆ්නා පන්දු යවන්නෝ දැඩි පීඩනයක් එල්ල කළහ. ආරම්භක පිතිකරු ධනුෂ්ක ගුණතිලක සහ අංක 3 පිතිකරු පාකිස්තානයේ අසාම් ඛාන් තරමක් වේගයෙන් පන්දුවට පහරදීම නිසා 6 වැනි ඕවරයේදී ලකුණු 50 සම්පුර්ණ කිරීමට ගෝල් ග්ලැඩියේටර්ස් කණ්ඩායම සමත්වුණත්, ඔවුන් ලකුණු 100 සම්පූර්ණ කළේ තවත් ඕවර 10කට පසුවය.
ඒ අතරතුර ගෝල් ග්ලැඩියේටර් කණ්ඩායමේ පිතිකරුවන් ඇද බැඳ තබා ගැනීමට වැඩිපුරම සමත්වූයේ යොවුන් දඟපන්දු යවන්නා වනිඳු හසරංගය. කඩුලු 2ක් බිඳ වැටුණු ඔහුගේ ඕවර 4දී ප්‍රතිවාදීන්ට ලබාගත හැකිවූයේ ලකුණු 12ක් පමණි.
ගෝල් ග්ලැඩියේටර්ස් ඉනිම ඉහළට ඔසවා තැබුවේ මුළු ලකුණු සංඛ්‍යාව 92ක්ව තිබුණු 14 වැනි ඕවරයේදී පිටියට පිවිසි නායක අෆ්රිඩිය. ඔහු පැමිණ මොහොතකින් මිලින්ද සිරිවර්ධන ආපසු ක්‍රීඩාගාරයට ගියත්, ඊළඟට පැමිණි ශෙහාන් ජයසූරිය එක් අන්තයක රඳවා තැබූ මේ පළපුරුදු පිතිකරුවා හැකි සෑම අවස්ථාවකදීම පන්දුවට පහරදීමේ වාරය ලබාගනිමින් සුපුරුදු පිතිහරඹ සැණකෙළිය දියත් කළේය.
ජැෆ්නා කණ්ඩායමට ක්‍රීඩා කරන දකුණු අප්‍රිකානු පන්දු යවන්නන් වන ඩුවේන් ඔලිවර් සහ කයිලි අබෝට් දෙදෙනා එළව එළවා පහර දුන් අෆ්රිඩි හයේ පහර 6ක් එල්ල කළේ ඔවුන්ගේ පන්දුවලටය. අවසන් ඕවර කිහිපයේදී ප්‍රතිවාදීන් දැඩි පීඩනයකට හසු කළ හෙතෙම පන්දු 23කින් ලකුණු 58ක් රැස් කරමින් අෆ්රිඩි තවමත් තරුණ බව ලොවට කියා පෑවේය. ඔහු ආපසු ක්‍රීඩාගාරයට ගියේ 6 වැනි කඩුල්ලට ලකුණු 66ක් එකතු කරමින් මුළු ලකුණු සංඛ්‍යාව 155 දක්වා ඉහළ දමමිනි.
පිළිතුරු ඉනිම ක්‍රීඩා කළ ජැෆ්නා ස්ටැලියන්ස් කණ්ඩායමේ ආරම්භක පිතිකරු 22 හැවිරිදි අවිශ්ක ප්‍රනාන්දුට ලකුණු 10ක් රැස් කිරීමට පන්දු 20ක් වැයවූවත්, අනතුරුව සුපුරුදු රටාවට පිවිසෙමින් ඔහු මුහුණ දුන් ඊළඟ පන්දු 43කට ලකුණු 82ක්ම එක් කිරීමට සමත්වූයේ ප්‍රතිවාදී පන්දු යවන්නන්ට දැඩි හිසරදයක් බවට පත්වෙමිනි.
තරගයේ ජයග්‍රහණය සිය කණ්ඩායමට අත්කර දෙනතුරුම ආපසු හැරී නොබැලූ අවිශ්ක ප්‍රනාන්දු නොදැවී ලකුණු 92ක් රැස් කළේ පන්දු 63කිනි. ඔහුගේ ඉනිමට හතරේ පහර 5කුත්, හයේ පහර 7කුත් ඇතුළත් විය. තරගයේ වීරයා සම්මානයත් ඔහුටම හිමිවිය.
අනිත් ආරම්භක පිතිකරු මිනෝද් භානුක සහ අංක 3 පිතිකරු ටොම් මුවර්ස් දෙදෙනාම දැවී ගියේ ලකුණු 18 බැගින් ලබා සිටියදීය. අනතුරුව අවිශ්ක සමග එක්වූ පාකිස්තාන පිලේ පළපුරුදු තුන්ඉරියව් ක්‍රීඩක ෂොහීබ් මලික් නොදැවී ලකුණු 27ක් රැස් කළ අතර දෙදෙනා එක්ව තුන්වැනි කඩුල්ලට ලකුණු 110ක නොබිඳුණු සම්බන්ධතාවක් ගොඩනගා ගත්හ.
